وليد ربيع يكتب :الحقيقة اللي محدش بيقولها في الشغل
الحلقة الأولى: أول يوم شغل.. ."لما الذكاء انقلب ضدي "
بقلم / وليد ربيع
في أول يوم شغل ليا في 2005
دخلت بطاقة عالية جدًا.
زي أي حد عايز يثبت نفسه بسرعة.
في أول ساعة، شفت زميل بيدخل كلمة السر على الجهاز.
وبحكم إني حافظ الكيبورد كويس،، استنتجتها من حركة إيده.
بعدها بدقايق قالّي:
“تعالى نفتح الجهاز وأشرح لك الشغل”
وهنا،، قررت أعمل حركة تثبت إني مختلف.
كتبت الباسورد قبل ما يقولي.
والجهاز فتح فعلاً.
كنت مستني انبهار،، لكن اللي شفته كان صدمة.
ملامحه اتغيرت، طريقته اتغيرت.
وفجأة،، بقيت شخص “مش مريح”
يومها فهمت درس مهم جداً:
مش كل حاجة تعرف تعملها،، لازم تعملها.
في بيئة زي البترول، الثقة أهم من الانبهار.
لأنك ممكن تبهر الناس مرة،،
لكن تخسر ثقتهم لفترة طويلة.
الذكاء الحقيقي مش في إنك تثبت إنك شاطر،
الذكاء الحقيقي إنك تعرف إمتى تظهر ده، وإزاي.
في الشغل،،
أحيانًا أول حاجة تخليك تخسر،،
هي إنك تحاول تكسب بسرعة.
